Засгийн газар өнөөдөр ээлжит бусаар хуралдан тусгай үүргийн онгоцоор ирсэн иргэдийн тусгаарлалтын асуудлаар цаашид авах арга хэмжээ, Дарханы замыг барихаар ирэх хятад ажилчдын асуудлыг хэлэлцлээ.

Дархан-Улаанбаатар чиглэлийн авто замыг барих 105 Хятад ажилчныг чартер нислэгээр татан авахаар болсон тухай Зам тээврийн хөгжлийн сайд Б.Энх-Амгалан өнгөрсөн баасан гаригт /2020.03.20/ мэдэгдсэн.

Харин өнөөдрийн хурлаар онцгой дэглэмийн үед гадаад ажилчид оруулж ирэх шийдвэрийг хойшлууллаа.

Мөн тусгаарлагдсан иргэдтэй, хил шалган нэвтрэх товчоонуудын эрүүл мэндийн байгууллагуудад ажиллаж буй резидентүүдийг ажиллуулахаа больж, мэргэжлийн эмч сувилагчдыг авч ажиллуулахаар шийдвэрлэлээ.

Түүнчлэн хилийн боомтуудаар орж гарах зорчигч тээврийн хөдөлгөөнийг дөрөвдүгээр сарын 30-ныг хүртэл сунгаж иргэдийг гаргахгүй, гаднаас иргэд оруулж ирэхгүй байх шийдвэрийг зам тээврийн яам гаргалаа. 

Харин Алтанбулаг боомтоор дамжин ОХУ-аас орж ирэх иргэдийг энэ сарын 23-ны 18:00-аас 28-ны өдрийн 08:00 цаг хүртэл хүлээн авах юм байна.