Их Британи улс коронавирусийн тархалтыг зогсоох зорилгоор улс орон даяар хатуу хөл хорио тогтоох болсныг мэдэгдлээ.

Их Британи улсын ерөнхий сайд Boris Johnson "Одоогийн байдлаар иргэд үндсэн хэрэгцээний зүйлс худалдаж авахаас бусад тохиолдолд гэртээ байх ёстой. Шаардлагагүй барааны дэлгүүрүүдийг хааж, хамт амьдардаггүй л бол хоёроос дээш хүн цуглахыг хориглож байна. Хэрвээ иргэд энэ шаардлагыг дагаж мөрдөхгүй бол торгууль ноогдуулах, аливаа цуглаан зэргийг албадан тараах гэх мэт эрх мэдэл нь цагдаа нарт байгааг анхааруулж байна. Номын сан, тоглоомын талбай, гадаа спорт заал, мөргөл үйлдэх газар гэх мэт бусад байрыг мөн даруй хаахаар шийдвэрлэлээ" хэмээн мэдэгдлээ.

Мөн тэрээр "Коронавирусын тархалт улс үндэстний аюулгүй байдлын хэмжээнд хүрсэн энэ үед иргэд гэртээ байх өчүүхэн туслалцаа нь маш том нэмэр болно" хэмээн хүссэн юм.

Их Британи улсын хувьд уг тахлын 6650 тохиолдол, 335 нас баралт бүртгэгдээд байна. Гэрээсээ ажиллах боломжгүй тохиолдол ажилдаа явж болох ч эдгээр гадуур ажиллаж буй хүмүүст өвчнөөс урьдчилан сэргийлэх, нийгэмд хяналт тавих талаар сургалт явуулж, мэдлэг олгох нь чухал юм.

Эх сурвалж: BBC