ЭМЯ-ны хэвлэлийн хурлын үеэр хяналтад байсан Турк хоёр иргэнээс коронавирусийн халдвар илэрсэн талаар мэдээллээ. 

ХӨСҮТ-ийн ерөнхий захирал Д.Нямхүү "Токио-Улаанбаатар чиглэлийн тусгай үүргийн онгоцоор ирсэн 25 хүнээс коронавирусийн халдвар илрээгүй. Тандалтад хамруулсан 23 иргэнээс халдвар илрээгүй. 

Хянагдаж, тусгаарлалтад байсан хоёр Турк иргэнээс коронавирусийн халдвар илэрлээ. Туркийн ЭСЯ-ны ажилтны ар гэрийн гурван хүн ирсэн. Эдгээр иргэдтэй ойрын хавьтал болсон 10 хүнийг тусгаарлан, шинжилгээнд хамруулж байна" гэв. 

ЭМЯ-ны хэлтсийн дарга Д.Нарангэрэл "Сүүлийн 24 цагийн байдлаар 205 оронд халдвар бүртгэгдсэн байна. 

АНУ-д өвчлөлийн хурд саарахгүй байна. 2272 хүн ажиглалтад байна. Эмчлэгдэж буй иргэдийн биеийн байдал дунд зэрэг байна" гэв.

ЭМЯ-ны Гадаад харилцааны хэлтсийн дарга Б.Янжмаа "Европын ихэнх оронд хөл хорио тогтоосон нь 54 мянган хүний амийг аварсан гэж эрдэмтэд үзэж буй. 

БНСУ-д мөрдөгдөж буй хуулийн дагуу хөл хориог зөрчсөн тохиолдолд 3 сая вонны торгууль ногдуулна" хэмээн дэлхийн улс орнуудад мөрдөгдөж буй хуулийн хэрэгжилтийн талаар тайлбарлалаа.