ЭМЯ-наас коронавирусийн халдварын нөхцөл байдлын талаар мэдээлж байна. 

ЭМЯ-ны хэлтсийн дарга Д.Нарангэрэл "Манай улсын хувьд батлагдсан 14 тохиолдол бүртгэгдсэн. Өнгөрсөн 24 цагийн байдлаар Дархан-Уул болон Сэлэнгэ аймагт уушгины хатгалгааны шинжтэй сэжигтэй хоёр тохиолдлыг тусгаарласан. 

Дархан-Уул аймагт сэжигтэй тохиолдлоор бүртгэгдсэн эмэгтэйтэй ойрын хавьтал болсон 7 иргэнийг тусгаарласан. Сэлэнгэ аймагт бүртгэгдсэн иргэн өөрийгөө гэртээ тусгаарласан учраас ойрын хавьталгүй байна" гэв.  

АНУ-д бүртгэгдсэн халдварын тохиолдлуудын 25 хувь нь шинж тэмдэггүй байсан. 

ЭМЯ-ны Гадаад харилцааны хэлтсийн дарга Б.Янжмаа "АНУ-д бүртгэгдсэн халдварын тохиолдлуудын 25 хувь нь шинж тэмдэггүй тохиолдол байсан. Вашингтон хотод хөл хорио тогтоосон нь халдварыг хумихад нөлөө үзүүлсэн гэж судлаачид тэмдэглэсэн. ХБНГУ-д хөл хориог дахин 14 хоног сунгасан байна" гэв. 

ХӨСҮТ-ийн ерөнхий захирал Д.Нямхүү "ХӨСҮТ-д нийт 192 иргэн тусгаарлагдсан. Нийт 273 хүнд давтан шинжилгээ хийхэд коронавирус илрээгүй. Токиогоос тусгай үүргийн нислэгээр ирсэн 26 иргэн эмнэлгээс гарлаа" гэв.