Японы Засгийн газар коронавирусийн халдвараас урьдчилан сэргийлэх хүрээнд манай улсад Олон улсын улаан загалмайн нийгэмлэгийн шугамаар 235 мянган ам.долларын буцалтгүй тусламж үзүүлэхээр болсноо өнөөдөр ГХЯ-нд мэдэгдлээ. Бусад хандивууд:

-Түүнчлэн БНСУ-ын Эрүүл мэндийн яамнаас манай улсад 250 мянган ам.доллар бүхий коронавирусийн шинжилгээний оношлуур хандивлах болсныг тус улсаас манай улсад суугаа ЭСЯ-наас ГХЯ-нд мэдэгдээд байна. Мөн Монгол дахь Солонгос иргэдийн нийгэмлэгээс 2000 оношлуурыг Улсын Онцгой комисст хандивласан аж.

-Бүгд Найрамдах Сингапур улсын “Темасек” олон улсын сангаас тус улсад үйлдвэрлэсэн "Fortitude 2.0" нэртэй коронавирусийн 3000 ширхэг оношлуурыг энэ сарын 4-нд Монгол Улсад хандивлажээ. Үүнээс гадна Монголд үйл ажиллагаа явуулдаг Сингапурын зарим бизнес эрхлэгчид дээрх оношлуурыг нэмж худалдан авахад зориулж 30000 сингапур долларын буцалтгүй тусламж үзүүлээд байгаа юм. 

-Бүгд Найрамдах Индонез улс дахь Монгол улсын Ерөнхий өргөмжит консул Чандра Гозали манай улсад Монголын Улаан загалмайн нийгэмлэгийн шугамаар 20000 ширхэг амны хаалтыг өнгөрөгч сард хандивласан.

Ийнхүү Азийн улс орнууд энэхүү хүнд сорилтыг хамтдаа даван туулж, хамтран ажиллах хүрээнд манай улсад сэтгэл санааны болон шаардлагатай тоног төхөөрөмж, эд зүйлсийн дэмжлэг туслалцааг үзүүлсээр байна.