Хариуцлагатай хандаж, чин сэтгэлээ зориулсан ажил болгон амжилт дагуулдаг.

Хэнд ямар мөрөөдөл байна, түүнд тийм л ирээдүй байна гэдэг шүү дээ. Минийхээр амжилт бол өөртөө болон өрөөлд хэлсэндээ хүрэх. Идэр залуу насандаа өөртөө амлаж, хүсэж мөрөөдсөн бүхэндээ гэр бүл, найз нөхөд, хамт олон, иргэдийнхээ дэмжлэгээр хүрчээ.

Тухайлбал, Сүхбаатарчуудыг соён гэгээрүүлэх гэсэн дэврүүн хүслээр BBS телевизийн сувгийг байгуулж байлаа. Одоогоос 15 гаруй жилийн өмнө Баруун-Уртчууд зурагтаар гарах сонирхолгүй байхад “BBS” суваг маань Сүхбаатарчуудын амьдралын хэмнэл, өөртөө итгэх итгэлийг нэмэгдүүлж чадсан гэж хэлж болно.

Хожим орон нутгийн удирдах албанд ажиллах хугацаандаа хамт олныхоо хүчээр аймгийнхаа хөгжил цэцэглэлтийг цоо шинэ түвшинд хүргэсэн гэж итгэлтэйгээр хэлж чадна. Хот хөдөөгийн ялгааг арилгаж, Баруун-Урт хотоо хүн бүрийн хүсэж мөрөөддөг тийм л хот болгоно гэхэд хоосон амбицалж, бүтэшгүй зүйл мөрөөдөж байна гэж жуумалзан инээх хүнтэй бишгүй л таарч байлаа. 2008 оноос Ардчилсан нам аймагтаа бодлого хэрэгжүүлэх боломж олдож, удирдах албанд 8 жил ажиллах хугацаанд олон үзүүлэлтээр аймаг маань 21 аймгаас 19-20 дугаарт жагсдаг байсан бол эхний 3-руу шилжиж, шилдэг аймгаар 4 удаа шалгарсан.

Хоккей болон Волейболын холбооны тэргүүний хувьд улсын тэмцээнд оролцох бүү хэл зүүн бүсээсээ 20-иод жил шалгараагүй аймгийнхаа багаа улсын тэмцээнүүдэд амжилттай оролцуулах зорилт тавьсан. Үүний хүрээнд бид Волейболын олон улсын мастер Г.Баярсайхан багшийг Сүхбаатар аймагт урьж, гурван жилийн хугацаанд залуусаа чадваржуулсны үндсэнд Сүхбаатарын баг улсын тэмцээнүүдэд удаа дараалан томоохон амжилтыг үзүүлсэн.  

Хүүхэд байхад ээж, аав, уншсан зохиолын баатрууд хүнийг төлөвшүүлдэг бол идэр залуу насанд найз нөхөд, ойр дотны хүмүүс, хийж буй ажил нь болж хувирдаг. Сүүлд Эзра Вогэлийн бичсэн XX зууны түүхэнд нэрээ үлдээсэн Хятадын удирдагч Дэн Сяопин-ы намтрыг уншлаа.

Улс үндэстэн, хүн төрөлхтний түүхэн өөрчлөлтийн төлөө зоримог үйл хэргийг бүтээж, удирдагч хүн ямар зарчимтай байх ёстойг үлгэрлэсэн хүн гэж дүгнэлээ. Том мөрөөдлийнхөө төлөө эрч хүчтэйгээр, шантралгүй зүтгэж 150 жилийн турш Хятад үндэстний гүйцэлдүүлж чадаагүй мөрөөдлийг 72 настайдаа сая нэг бодит болгосон энэ эрхмийн түүх надад маш том нөлөөлөл, эрч хүчийг өгсөн.  

Жинхэнэ удирдагч бол хүндлэгдэх биш хайрлагддаг 

Бусдыг хүчинд автуулж хүндлүүлнэ эс бөгөөс боловсрол, эрх мэдлээрээ, давуу байдлаараа үнэлэгдэж хүндлүүлж болно. Гэхээ хайрлагдана  гэдэг бол огт өөр нэр томьёо. Бусдыг ойлгох, туслах сэтгэлтэй байж хайрлагдана. Миний удирдах арга барил бол аливаад чин сэтгэлээсээ хандан хамт олныхоо хүсэл зорилго, зүрх сэтгэлийг ижил зорилгын зүгт чиглүүлж,  хамтын зүтгэл, хүсэл тэмүүллээр урагшилдаг.

Аливаа багийг удирдаж байгаа хүн сайн сайхан ирээдүй рүү тэмүүлж байгаагаа бусдад ойлгуулж, чин зүрхнээсээ тэмүүлж байгаа зорилгодоо бусдыгаа нэгтгэж чадсан цагт хүн бүрийн хичээл зүтгэл сая амжилт болж хувирна. 

Тухайлбал, телевиз байгуулчхаад өөрөө цалин гэж бараг авахгүй, олсон жаахан мөнгөө багийнхныгаа цалинжуулаад, хүмүүсийн сэтгэлд нийцсэн бүтээл гаргах гэж өдөр шөнөгүй зүтгэхдээ, ажлаасаа авах таашаалаар л бид урамшдаг байлаа.

Би их өөдрөг үзэлтэй. Хүн эрх чөлөөтэй, хувийн өмчтэй байх боломжийг хязгаарласан, дуртай газраа амьдарч, аялж болдоггүй нийгмийг туулсан хүний хувьд хичээх л юм бол хүссэндээ хүрэх боломжийг ардчилсан тогтолцоо бидэнд олгосон гэдгийг хүмүүс үргэлж санаж яваасай гэж хүсдэг.  

Тухайлбал, Баруун-Урт хотын хөгжил 70, 80 ,90-ээд онд өнөөдрийнх шиг байгаагүй. Ганц Сүхбаатар бус Монголын бүх аймаг, сум алхам алхмаар урагшилж, хөгжиж байна.

Харин бүсчилсэн хөгжлийн хангахын тулд өдгөө орон даяар ажлын байр хомс байгаа нь хурцадмал асуудал болж буй. Тиймээс төр ажлын байрыг нэмэгдүүлэх, баялгийг үр ашиглтай хуваарилахын төлөө төр ажиллах ёстой. Хүн ажил, орлоготой байж эрүүл хоол хүнс хэрэглэж, эрүүл мэндийн сайн үйлчилгээ авч, хүүхдээ боломжийн сургуульд сургаж , ая тухтай амьдарч чадна шүү дээ.

Манай Сүхбаатар аймаг 4 сая гаруй малтай, иргэдийн 50 орчим хувь нь мал аж ахуй эрхэлж амьдарч байна. Үлдсэн хэсэг нь төрийн болон хувийн хэвшилд ажиллаж, цаана нь олон мянган залуус ажлын байр идэвхтэй хайж буй.

Дашрамд дурдахад нэгэн цагт мөрөөдөл мэт сонсогддог байсан Монгол улсын далайд гарах хамгийн дөт гарц болох Сүхбаатар аймгийн Бичигтийн боомтыг-Зүүн хатавч боомттой холбох төсөл хэрэгжиж эхэлсэн. Бичигтийн боомтоос 7 км-ийн зайтай орших Өвөр Монголын Шилийн гол аймгийн Зүүн хатавч боомт Шар тэнгисийн Жинжү далайн боомттой төмөр замаар холбогдсон.

Тиймээс энэ боломжийг ашиглаж малын мах, түүхий эдийг дэлхийн стандартаар боловсруулах, сайн менежмент бүхий экспортын үйлдвэрүүд байгуулж олон улсын зах зээлд нийлүүлснээр Монголыг төлөөлөх үнэ цэнэтэй брэнд бий болгох хөгжлийн гарц бий. Үүний үр дүнд малын түүхий эдээс олох малчдын орлого нэмэгдэж, олон мянган залуусыг ажлын байраар хангаснаар Сүхбаатар аймаг төдийгүй Монгол улс хөгжих нь дамжиггүй.