Амжилт тухайн хүний амьдралыг харах өнцөг, аливаад хандах хандлагаас хамааран өөр өөрөөр тодорхойлогдох байх. Миний хувьд хүн төрөлхтөн бүгд бие биеэсээ хамааралтай амьдардаг учраас өөрт хамааралтай хүмүүсийг амар амгалан байлгах, тэдэнд амласан амлалтдаа эзэн байхыг амжилт гэж боддог.

Хүн бүхэн цор ганц төрсөн учраас би хүн даган дуурайхыг төдийлөн таалдаггүй. Гагцхүү ментор гэж үзсэн хүнийхээ мэргэн ухаан, ажил хэрэг бүтээх арга барил, зарчим, туршлагыг  үнэлж, суралцахыг эрхэмлэдэг.

Өнгөрсөн хугацаанд хамт нэг багт ажиллаж байсан Скайтел ХХК-ийн гүйцэтгэх захирал Д.Болор ахыг менторуудынхаа нэгээр нэрлэнэ. Энэ хүний эрч хүчтэй, бусдыг нэг зорилгод нэгтгэн зөв зүгт чиглүүлж чаддаг удирдах арга барил, ажил хэрэгч зан чанараас үргэлж үлгэр жишээ авсаар ирсэн.

Хүнээс хамаарч эсвэл бусдад гарз, хохирол учруулахгүйгээр чин шударгаар, өөрийн хөдөлмөр, зүтгэлээр амьдарлаа бүтээж яваа минь өөртөө итгэх үндэс болдог.  

• Эрүүл, аюулгүй амьдрах орчиныг бүрдүүлэх нь нэр тэргүүний асуудал

Хэнтий аймгийн Чингис хотын хувьд иргэдийн амьдрах орчны аюулгүй байдал нэн түрүүнд анхаарах ёстой асуудал болоод буй. Газар нутгийн хувьд хонхор бүсэд байрладаг тул зун болгон үерт автаж, айлуудын нүхэн жорлон үерийн усаар дүүрч, хальж гарч ирдэг нь иргэдийн амьсгалах агаар, ундны усыг бохирдуулж хүний эрүүл мэндэд ихээхэн сөрөг нөлөөллийг үзүүлдэг. 

Дэвшилтэт технологи, орчин үеийн шийдлээр амьдрах орчны дэд бүтцийг сайжруулах гарцыг эрэлхийлэхийн оронд сонгуулийн настай нүд хуурсан ажил хийж байгаа нь орон нутгийн хөгжлийг гацааж байна.

• Ажлын байр, хот хөдөөгийн хөгжлийн ялгааг арилгах

Орон нутагт ажлын байр хомс байгаа нь ядуурлын шалтгаан болдог. Мөн соёл, урлагийн үзвэр, үйлчилгээ хангалтгүй хот хөдөөгийн ялгаа тэнгэр газар мэт байгаа учраас залуу мэргэжилтнүүд нь хот суурин бараадсанаар хүйсийн тэгш харьцаа алдагдаж байна.

Иргэддээ хөдөлмөрлөж, баялаг бүтээх боломжийг нь хангахын оронд халамж хавтгайруулж, хоол, хүнсний талон тарааж байгаа нь хөгжлийн зохистой бодлого хэрхэвч биш юм.

Монгол залуус харийн оронд очоод өдөр шөнөгүй хичээн хөдөлмөрлөөд байгаагийн шалтгаан нь тухайн нийгэм хөдөлмөрийн нь үнэлж чадаж байна. Хэрэв Монголд тийм хэмжээний цалин авч ажиллах нөхцөлийг бүрдүүлбэл тэл эх орондоо илүү их баялаг бүтээнэ. Шалтгаан нь Монголоос гарахаараа толгой нь ажиллаад, ажил хийх эрч хүч ундарч байгаа хэрэг биш бид ерөөсөө л хөдөлмөрийн үнэлэмжийн асуудал байгаа юм.

Орон нутагт иргэд маш их намчирхаж, талцаж байгаа нь харагддаг. Сонгодог утгаараа бол нам бодлого боловсруулж, харин иргэд намыг биш өөрт таалагдсан, зөв гэж үзсэн бодлогыг л дэмжих ёстой.

Өөрийгөө засаад өрхөө засчихсан, бидний үеийн залуус оршин буй нийгэм, улс орныхоо сайн сайхан ирээдүйн төлөө мэдлэг, туршлага, сэтгэл зүрхээ зориулахгүй, Монголын улс төр бохир, улс орон хөгжихгүй байна шүүмжлээд байвал хэн энэ улс орныг зөв зүйтэй хөгжлийн гольдирол руу оруулах вэ дээ.

Гадны улс орнуудаар туршлага судалж аялах тоолонд, Монголынхоо хөдөө орон нутгийг бүсчлэн хөгжүүлж, Улаанбаатарын төвлөрлийг сааруулах  асар олон боломж байгаад ойлгодог.

Гэтэл удирдах засаглалын хүмүүс уг боломжийг олж харахгүй, иргэддээ нээж өгөхгүй, амин хувьдаа ашиглаж байгаа нь харамсалтай санагддаг.

• Хотод авч буй соёл, урлаг, спорт, хувь хүний хөгжлийн үйлчилгээг орон нутагт ч нэвтрүүлж, эрүүл аюулгүй, ая тухтай амьдрах нөхцөлөөр Хан Хэнтийчүүдээ хангаж хот хөдөөгийн ялгааг арилгах.
• Аймагтаа олон улсын үзэсгэлэн худалдааны томоохон бааз байгуулах хэтийн хүсэлтэй. Томоохон компаниуд шинэ техник технологио танилцуулахаар дэлхийн өнцөг булан бүрээс Монголд чуулж, үүнтэй танилцахаар бизнесмен, жуулчид хэдэн саяараа Хэнтийг зорьдог хөгжлийн түүчээ аймаг болгохын хүсдэг.
• Эзэн Чингисийн төрж өссөн өлгий нутгийн онгон дагшин байгаль, түүх, соёлыг үзэхээр  зорин ирэх  жуулчдын тоо, тэдний сэтгэл ханамжийг нэмэгдүүлэхийн тулд технологийн дэвшлийг ашиглан аялагчдад гайхамшигт түүхийг мэдрүүлэх үзвэр, үйлчилгээ хийгээд ая тухтай орчныг бий болгох эрмэлзэлтэй.