“Амьдралын энгийн хэрнээ эерэг өөрчлөлт бүхэн амжилт”

Миний хувьд амжилтыг маш энгийн зүйл гэж боддог. Хүний амьдралын явцад гарч буй ахиц дэвшил, эерэг өөрчлөлт бүхэн амжилт. Цаг хугацаа улиран оддог ч хүний чин санаа мөнх хэвээр оршдог. Энэхүү чиг шугамдаа үнэнч урагшилж байхад багахан хэмжээгээр ч болов шат ахиж, өгсөхийг амжилт гэж ойлгодог. Сургууль төгсөх, шинэ ажилд орох, албан тушаал ахих, гэр бүл болох, үр хүүхэдтэй болох, ээж аавынхаа ачийг хариулах гээд бидний амьдралын энгийн хэрнээ эерэг өөрчлөлт бүхэн амжилт шүү дээ.

“Хэрэгтэй үед нь бусдыг урмаар тэтгэж, итгэлийн галыг нь асааж байх хэрэгтэй.”

Хүн өөртөө итгэх итгэл дүүрэн байснаар тулгарсан сорилт бэрхшээлийг даван туулж, дэвшүүлсэн зорилгодоо тууштай байж, эцэст нь түүндээ хүрдэг. Мэдээж ямар ч эрч хүчтэй хүний итгэл мохдог үе амьдралд бий. Гэсэн ч бүх зүйл мөнх бус, хором хугацаатайг ухамсарлавал амьдралыг өөр өнцгөөс харж чадна. Зөв бөгөөд шударга зүйлийн төлөө, бусдын сайн сайхны төлөө амьдарч, тэмцэж байгаагаа харин өөртөө үргэлж сануулж, өөрийгөө зоригжуулж байх хэрэгтэй. Үүний нэгэн адил хэрэгтэй үед нь бусдыг урмаар тэтгэж, итгэлийн галыг нь асааж байх хэрэгтэй.

“Надад хамгийн ихээр нөлөөлсөн хүн бол Монголын нэрт яруу найрагч, улс төрч Очирбатын Дашбалбар”

Өнөөдрийн Н.Ганибалын оюун санаа бүрдэхэд хамгийн ихээр нөлөөлсөн хүн бол Монголын нэрт яруу найрагч, улс төрч Очирбатын Дашбалбар агсан. Түүнийг хүүхэд ахуй цагаасаа хүндэтгэж, бүтээл туурвилыг нь уншиж, үзэл санааг нь дэмждэг байлаа. Тэрээр цаг үеэсээ түрүүлэн харж, эх орон, газар нутаг, тусгаар тогтнолынхоо төлөө тэмцсэн. Үүнийхээ төлөө олон шүүмжлэлд дарагдаж байсан ч шантраагүй. Бага залуу байхдаа О.Дашбалбар агсны бэрхшээлд нугараагүй, эх оронч чанараас нь суралцахыг хүсдэг байлаа.

“Залуучуудад амьдралынхаа замыг сонгох боломж нь нээлттэй байдаг”

Хүн бүр хичээвэл Билл Гейтс шиг амьдрах боломжтой. Залуучуудад амьдралынхаа замыг сонгох боломж нь нээлттэй байдаг. Хамгийн гол нь хичээл зүтгэл, зорилго тэмүүлэл бөгөөд түүнийхээ төлөө тууштай тэмцэх нь нэн чухал. Мөрөөдөлтэй хүнд аливаа бэрхшээлийн ард гарах боломж үргэлж байдаг. Хүн юу хүсэж, мөрөөднө яг л тэр замаараа алхдаг учраас үргэлж эерэг бодолтой байж, сайн сайхан руу тэмүүлэх учиртай. Би олон найз нөхөдтэй хүн л дээ. Найзууд минь миний амьдралын хамгийн эрхэм хүмүүсийн тоонд зүй ёсоор багтдаг. Энэ нөхөрлөл маань надад хамгийн том боломжийг олгож бид хамтдаа зүтгэн олон олон мөрөөдлийг биелэл болгосоор ирсэн.

“Шүүмжлэлийг бусдыг гутаан доромжлох, харлуулах гэж ойлгоод байгаа болохоос угтаа эрүүл үзэгдэл”

Сүүлийн үед л шүүмжлэлийг бусдыг гутаан доромжлох, харлуулах оролдлого гэж ойлгоод байгаа болохоос угтаа эрүүл үзэгдэл юм шүү дээ. Ажил хэрэгтэй холбоотой шүүмжлэл бол шууд утгаараа тухайн ажлын гүйцэтгэлийг сайжруулахад чиглэх байх. Харин хувь хүнд хандсан нь одоо байгаагаасаа хавьилүү дэвжихэд чиглэх ёстой. Ер нь шүүмжлэл нь аливаа зүйлийг илүү сайжруулах, засан залруулах хүсэл юм даа. Харин магтаал бол хүний амьдралын урам. Өглөө болгон нарандаа залбирч, хийж бүтээх эрч хүчээ авдаг шиг магтаал хүнд зайлшгүй хэрэгтэй. Миний хувьд шүүмжлэлд илүү хурцлагдан, зорьсондоо заавал хүрэх хүсэл эрмэлзэлдээ хөтлөгддөг.

Нэгдүгээрт, Монгол иргэн бүр эх орныхоо хаана ч амьдарсан ижил тэгш боломжоор хангагдах. Улсын нийслэлийн төвийн дүүрэгт амьдардаг иргэн ч, алслагдмал хөдөө орон нутагт амьдарч буй иргэн ч нийгмийн чанартай үйлчилгээнд тэгш хамрагддаг болохыг би хүсдэг.

Хоёрдугаарт, Монгол Улсын ялангуяа хөдөө орон нутгийн боловсролыг дэлхийн чанарт хүргэх. Эх орны ирээдүй болсон хүүхэд, залуус боловсролын чанартай үйлчилгээнд хамрагдаж, олон улсын түвшинд өрсөлдөх чадвартай байхыг би хүсдэг.

Гуравдугаарт, монгол малын түүхий эд, бараа бүтээгдэхүүний үнийг дэлхийн жишигт хүргэх. Ингэснээр малчдын амьдрал ахуйд төдийгүй улс орны эдийн засагт жинтэй өөрчлөлт гарна гэж би тооцоолдог.

Дөрөвдүгээрт, Сүхбаатар аймагт аялал жуулчлалыг хөгжүүлэх. Аялал жуулчлал дагасан дэд бүтэц хөгжиж, бизнес өргөжихийн хэрээр ажлын байр нэмэгдэн, иргэдийн амьдралын түвшин сайжрах болно.